وسلسلة ال Honor وبعدها رقم زى ال HONOR 50 اللى نزل من فتره دى سلسله الهاى اند او فئه متوسطه عليا.. وأخيرا سلسلة ال X الجديده دى الفئة المتوسطه.. ودى فيها 3 اجهزه
ال X7 وال X8 وال X9 .. وفى الالبوم ريفيو دا هتكلم عن تجربتى لل X8 .. موبايل بيتقدم هنا فى السوق ب ٥٩٩٩ جنيه و المفروض لو مكانتش حصلت زيادات الاسعار الأخيره دى كان هيبقى سعره فى اواخر ال 4000 .. لكن دا اللى حصل للاسف .. فالمهم .. خلينى اقولكم خلاصة تجربتى للجهاز لانه معايا من أكتر من شهر 🤫
شاشة الجهاز دا لما تبص عليها هتحس انك ماسك جهاز اغلى من سعره بكتير 💵 بسبب الحواف الصغيره جدا بتاعتها .. لدرجه ان فتحه سماعه المكالمات محطوطه فى الفريم نفسه من فوق بزاويه كدا !
لكن بعيدا عن جمال الشاشه الظاهرى.. خلينا نتكلم عن تجربتها الحقيقيه .. الشاشه جايه من نوع ips بحجم 6.7 بوصه وبدقه FHD+ وبريفريش ريت 90 هيرتز.
والتجربه هنا اجمالا كويسه.. زوايا الرؤيه والسطوع والألوان بيقدموا تجربه حلوه.. ولكن مش هبالغ … دى للأمانه مش افضل شاشه فى السعر دا .. والصراحه الشاشه دى لو كانت اموليد كانت هتحط الموبايل فى حته تانى خصوصا مع الحواف بتاعتها اللى شبه مش موجوده دى
اما على مستوى التصميم ف الجهاز واخد الترند اللى بدأته أبل
الحواف الحاده والظهر الفلات تماما.. وحتى شكل فريم الكاميرات هنا هتلاقيه مشابه جدا لسلسلة الايفون 13
لكن على خلاف الايفون.. الفريم والظهر هنا جايين من البلاستيك .. اينعم دا مساعد الجهاز انه وزنه يبقى خفيف وسمكه قليل.. ولكن كان نفسى على الاقل الظهر يبقى زجاج
الموبايل هتلاقى فيه المنافذ المعتاده .. منها البصمه المدمجه فى زرار الباور وأدائها سريع جدا 👌
وكمان الموبايل مازال محتفظ بمنفذ ال 3.5 ميللى ولكن فيه سماعه سبيكر وحيده من تحت ومفيش للاسف سماعات ستيريو.. اينعم صوت الجهاز كويس فى المستوى والجوده ولكن بردو فيه اجهزه كتير فى فئات اسعار اقل فيها سماعات ستيريو .. و المفروض الجهاز دا ميقلش عنهم
للاسف الموبايل متأخر عن باقى المنافسين فى موضوع سرعه الشحن .. كان نفسى يكون على الاقل ٣٠ وات ويشحن فى ساعه كانت التجربه هتبقى افضل .. أما دلوقتى خلينا نخش على البهاريس 😋 .. اداء الجهاز
معالج سنابدراجون 680 مع 6 جيجابايت رام من نوع LPDDR4X والذاكره الداخليه 128 جيجا من نوع ufs 2.2 .. ومفيش منه كذا نسخه .. دى النسخه الوحيده المتوفره 1️⃣
الأداء بقى فينقسم لجزئين.. الاول الأداء فى الألعاب .. والتانى اداء الاستخدام اليومى ..
وخلينا نبدأ الاول بالألعاب .. الجهاز دا زيه زى اى موبايل جاى بالمعالج دا .. مش بيقدم افضل تجربه العاب للاسف
يعني مثلا PUBG اشتغلت على Balanced Graphics وMedium Framerate
و COD اشتغلت على Medium سواء فى الـ Graphics او الـ Framerate
ودا العادى فى اى جهاز بيجى بالمعالج دا .. ف تجربة الالعاب للأمانه مش افضل تجربة فى سعره ..
لكن التجربه اليوميه كانت عامله ازاى ؟ 🤔
تجربة الاستخدام اليومى بقى .. كانت مختلفه تماما
تحس كدا ان المعالج اللى فى الجهاز اقوى من ال 680
بصوا المعالج دا كنت جربته فى جهازين قبل كدا
الريلمى 9i والشاومى ريدمى نوت 11
ولو هنقارن ال 3 اجهزه ببعض .. ف اكتر واحد فيهم قدم تجربه سلسله فى الاستخدام اليومى كان ال Honor X8 بفرق بسيط عن الريلمى.. ويجى الشاومى فى الاخر خالص..
ولذلك اعتقد الفضل فى دا لحاجتين ..
الحاجه الاولى هى الواجهه .. الـ Magic UI 4.2
الواجهه فيها مميزات كويسه جدا ولو انت استخدمت جهاز من هواوى او اونر قبل كدا هتبقى مألوفه ليك جدا.. وبشكل عام الانميشنز فى الواجهه واداءها اتحسن كتير عن قبل كدا وبقت بتقدم تجربه سلسله جدا على مواصفات الجهاز
الحاجه التانيه بقى هى ميزة الرام تربو
"يا تك على فكره الموضوع دا فكسان ومش بيأثر على الادء وانت عارف كدا متحورش بقى"
انا فاهمك والله وموافق على كلامك .. بس اسمعنى الاول .. الكلام اللى انت بتقوله دا بيعتمد على فكرة ان الجهاز بياخد كام جيجا من الذاكره ويضمهم على الرام وخلاص .. فى حين ان الموبايل مش بيعمل دا بس .. دا بيعمل حاجه تانى مشابهه للى بتعمله ابل فى ال iOS ودى هى اللى فارقه فعلا فى التجربه .. ف افهم الاول الميزه دى بتعمل ايه وبعد كدا احكم يا سيدى
"ايوا يعنى بتعمل ايه يا تك؟ "
اغلب الاجهزه دلوقتى بتاخد جزء من الذاكره الداخليه بتضمه للرام زى ما انت قولت
ميزه الرام تربو بتعمل دا.. وفى اعتقادى مش دا اللى فارق .. اللى فارق فعلا الحاجه التانيه اللى بتعملها الميزه دى و هى الضغط !!
"ضغط ايه يا تك دا انت اللى هتجيبلى الضغط 😂 "
ياعم اسمع 😂
ببساطه اللى بيحصل ان البرنامج اللى بيشغل مساحه معينه من الرام .. الجهاز بيضغط المساحه دى عشان تشغل مساحه اقل..
مثلا لو البرنامج واخد 1 جيجا رام .. الميزه دى بتخلى البرنامج طول ما انت مش بتستخدمه بيتم ضغط الداتا بتاعته فى الرام عشان تبقى 500 ميجا مثلا .. ولما ترجع تفتح البرنامج الجهاز بيفك الداتا دى ويرجعلك البرنامج واقف عند الحته اللى كنت سايبه فيها .. وهكذا ..
"طيب يا تك هل دا فارق فى التجربه؟ "
فارق جدا .. ولو مكنتش جربت كنت هقول انه كلام فكسان والله ..
انا فتحت برامج كتير جدا بما فيها العاب وقلبت ما بينهم ومفيش حاجه منهم حملت من اول وجديد .. فيه فيديو فى التعيلقات فيه الجزئيه دى لو حابب تشوفه ..
ف الخلاصه ان الموضوع فارق مع التجربه فعلا .. ودا خلانى اتخيل الميزه دى مع جهاز فلاجشيب ب 12 جيجا رام ادائها هيكون عامل ازاى 🤩
الشبكات فى الجهاز مفيش كلام عليها .. كالمعتاد من Honor شبكه بدون مشاكل .. صوت سماعه المكالمات عالى وواضح .. والجهاز فيه مايك تانى لعزل الضوضاء .. ولكن الجهاز بيفتقد لمستشعر التقارب والموضوع بيتم بالسوفتوير.. لكن دى يمكن افضل تجربه محاكاه لمستشعر التقارب شوفتها فى موبايل مفهوش مستشعر تقارب .. ف التجربه كويسه ولكن بردو لو كان فيه مستشعر تقارب كانت التجربه هتكون افضل ..
خلينا بقى نخش على الكاميرات
الصبح الكاميرا طلعت صور حلوه جدا كألوان ودايناميك رينج والتفاصيل كانت اكتر من مقبوله .. وصور البورتريه بتكون حلوه ولكن فيها غلطات بسيطه فى العزل
بليل فتحه العدسه الضيقه مأثره وبالتالى الصور بتكون ناعمه شويه.. ولكن معالجه الألوان والدايناميك رينج كانوا كويسين.. ولكن صور البورتريه بليل بتكون ناعمه شويه .. وممكن تتهز منك بسهوله لو مثبتش ايدك جامد وانت بتصور
-------
أما الكاميرات الخلفيه فى الجهاز ف هما 4 كاميرات ..
اتنين للماكرو و العزر مالناش دعوه بيهم 👋
ف خلينا الاول مع الكاميرا الاساسيه اللى جايه بدقة 64 ميجابيكسل مع فتحة عدسه f1.8
الكاميرا تفاصيلها كويسه والألوان حقيقيه جدا لكن الدايناميك رينج كان محتاج يتحسن شويه .. وبليل الكاميرا بتفضل مكمله بأداء متقارب جدا بس بتفاصيل اقل.. ولكن مع الوضع الليلى الدايناميك رينج بيظبط وكمان التفاصيل بتتحسن
أما الكاميرا الألترا وايد ف جايه بدقة 5 ميجابيكسل مع فتحة عدسه f2.2
ومش عاوزك تتوقع منها كتيير.. الصبح الصور مقبوله جدا.. لكن بليل صعبه شويتين خصوصا ان مفهاش وضع ليلى .. الكاميرا دى المفروض كانت تكون 8 ميجابيكسل على الاقل ..
خلاصة
كاميرا هاتف هونر HONOR X8 تتميز بكونها مدعومة بخاصية (Super Night Mode)، والتي تساعد على التقاط الصور ببراعة في أي بيئة حتى لو كانت الإضاءة ضعيفة أو حتى معتمة، وتأتي الكاميرا الرئيسية للهاتف بدقة 64 مجيابيكسل.
البطارية
أما بطارية الهاتف الجديد قتبللغ سعتها 4 آلاف مللي أمبير، وتدعم خاصية الشحن السريع، حيث توفر 10 دقائق من الشحن، إمكانية تشغل الهاتف فيديو لمدة 3 ساعات.
دا افضل جهاز بيقدم تجربة استخدام يومى سلسه ضمن الاجهزه اللى جربتها بنفس المعالج 👌
ولكن بردو فيه شويه عيوب .. ابزرها عدم وجود سماعات ستيرو .. او دقه الكاميرا الالترا وايد اللى كان المفروض تكون اعلى فى الدقه او حتى سرعه الشحن ..
ولكن الشئ المميز فعلا فيه ومش موجود فى جهاز تانى فى سعره هو الشاشه اللى بحواف شبه معدومه .. حقيقي منظر الجهاز دا هيخليك تحس فعلا انك ماسك جهاز فلاجشيب مش من الفئه المتوسطه .. وصدقنى الاحساس دا مش هوصلك من الصور زى ما هيوصلك لو نزلت فى اى مكان ومكست الجهاز فى ايدك وجربته ..
أما بخصوص سعر الجهاز ف نازل بـ 5999 جنيه.. وزى ما قولت قبل كدا .. الجهاز غالى ومش المفروض ندفع المبلغ دا مقابل المواصفات دى ..
ولكن بسبب انخفاض قيمة الجنيه.. دا خلى كل الاجهزه المنافسه ليه سعرها يزيد .. الجلاكسي A32 سعره دلوقتى يتعدى ال 6300 جنيه .. وكمان ال نوت 11S من شاومى النسخه ال 128 سعرها فوق ال 6200 جنيه.. ف للأسف دا واقع السوق دلوقتى وهنحتاج شويه وقت عشان نتعود عليه ..
فى النهايه شايف ان نقطه البيع الاساسيه فى الجهاز دا حاجتين ..
اولا وبدون نقاش مظهر الشاشه اللى بدون حواف اللى بتديه اكتر من سعره بكتير
ثانيا تجربه الواجهه وتحديدا الرام تربو فى تجربه الاستخدام اليومى على الجهاز
لو الحاجتين دول مهمين ليك ف الجهاز دا هيبسطك فى تجربة الاستخدام.. انما لو مش مهمين وبتدور على تجربه العاب اقوى وقتها فيه اختيارات تانى ممكن تكون مناسبه ليك اكتر ..
وبس كدا دى كانت كل حاجه عن الجهاز .. واكيد لو عندك اى سؤال اكتبه فى التعليقات وهنجاوبك فى اقرب وقت ❤️
ليست هناك تعليقات:
إرسال تعليق